سنجے دت خود پر بننے والی فلم دیکھ کر رو پڑے
بالی وڈ اداکار سنجے دت اپنی زندگی پر بننے والی فلم ’سنجو‘ دیکھ کر جذبات پر قابو نہ رکھ سکے اور رو پڑے۔
سنجے دت بھارتی فلم نگری کے واحد اداکار ہیں جن کی زندگی میں ہی ان پر فلم بنائی جا رہی ہے جس میں رنبیر کپور نے مرکزی کردار ادا کیا ہے۔
سنجے دت کی زندگی پر بننے والی فلم ’سنجو‘ سنیما گھروں کی زینت بن چکی ہے اور پہلے روز ہی فلم نے زبردست بزنس کر کے اپنی کامیابی کی نوید سنا دی ہے۔
سنجو بابا کی زندگی پر بننے والی فلم میں جہاں کامیڈی، رومانس اور جذباتی مناظر ہیں تو وہیں ان کی زندگی کے کئی پوشیدہ پہلو بھی اجاگر کیے گئے ہیں۔
بالی وڈ اسٹار اپنی ہی زندگی پر بننے والی فلم دیکھ کر جذبات پر قابو نہیں رکھ سکے ہیں اور فلم کی اسکریننگ کے دوران فلم کے پروڈیوسر کے ساتھ گلے لگ کر رونے لگے۔
فلم ’سنجو‘ کے ہدایت کار راج کمار ہیرانی نے اپنے انٹرویو میں بتایا کہ فلم کی شوٹنگ کے دوران کبھی بھی سنجے دت سیٹ پر نہیں آئے تھے جس کی وجہ سے ہمیں ڈر تھا کہ اسکریننگ کے دوران انہیں کچھ پسند نا آیا تو ریلیز کے لیے مشکلات ہوں گی۔
