چھوٹی چھوٹی چیزوں کو بھول جانا ذہانت کی نشانی
کثر اوقات گاڑی کی چابی بھول جانا، یا اپنے کسی دوست کی سالگرہ بھول جانا ہمیں بہت الجھن، پریشانی اور خفت میں مبتلا کرسکتا ہے۔
ہمیں لگتا ہے کہ شاید ہماری یادداشت کمزور ہوگئی ہے، لیکن درحقیقت اس طرح کی چھوٹی چھوٹی چیزیں بھول جانا اس بات کی علامت ہے کہ ہمارا دماغ صحت مند ہے اور درست طریقے سے اپنے افعال انجام دے رہا ہے۔
حیران ہوگئے نا؟ آئیں جانتے ہیں ایسا کیوں ہے۔
جرنل نیورون میں شائع ایک تحقیق کے مطابق درحقیقت کچھ بھولنے کا مطلب ہے کہ ہمارا دماغ نئی چیزوں کو سیکھنے کے لیے جگہ بنا رہا ہے اور اس کے لیے غیر ضروری چیزیں ضائع کر رہا ہے۔
یہ عمل ایسا ہی ہے جیسے ہم اپنے موبائل یا کمپیوٹر میں جگہ بنانے کے لیے غیر ضروری ڈیٹا ڈیلیٹ کردیتے ہیں۔
دراصل ہمارے دماغ کا مقصد تمام چیزیں یاد رکھنا نہیں ہوتا، بلکہ صرف وہی چیزیں یاد رکھنا ہوتا ہے جو مستقبل کے فیصلوں میں مددگار ثابت ہو۔
ایک تحقیق کے مطابق چھوٹی چھوٹی اشیا بھول جانا ہماری ذہانت میں اضافے کی بھی نشانی ہے کیونکہ اس کا مطلب ہے کہ ہمارا دماغ اب کچھ نیا سیکھے گا۔
ماہرین کے مطابق دماغ کا چھوٹی چھوٹی اشیا بھول جانا ایک بالکل نارمل بات ہے اور اس پر پریشان ہونے کی ضرورت نہیں۔
